GIHANGOP sa mga Bol-anon ang implementasyon sa Cebu-Bohol power interconnection project nga kaniadto pang gipamugos sa kadagkuan sa lalawigan.

Ang gisugdan nga pagpatuman sa mahinungdanong pagkutay nganhi sa dugang nga dakong kuryente gikumpirmar ni National Grid Corporation of the Philippines (NGCP) Visayas information officer Betty Martinez sa interbyu sa DYRD.

Sa pagpanguna ni kanhi gobernador ug karon Kong. Edgar Chatto, kaniadto pang gisitar ang NGCP sa pagpadali sa proyekto kay napanglantawan nang daan nga molapas ang power consumption demand sa Bohol sa di pa ang tuig 2020.

Nanguna gani si Chatto sa pag-awhag sa NGCP niini pinaagi sa mga resolusyon nga gipasar sa Bohol Energy Development Advisory Group, Provincial Development Council ug Regional Development Council niadtong 2016.

Apan nagtoo ang NGCP nga puwedeng sa 2021 pa kumpletohon ang Cebu-Bohol interconnection kay, basi sa lahi nga projection niini, sa maong panahon pa mosaka’g taas ang power demand sa Bohol.

Ang kalit nga pagsaka sa konsumo’s elektrisidad sa Bohol nga nasinati karong bag-o gikonsiderar nga nagmatuod nga wa nasayop ang kadagkuan sa probinsiya ug rehiyon nga sayohon ang Cebu-Bohol interconnection aron unta magamit na sa sunod nga tuig.

Gikinahanglan ang Cebu-Bohol interconnection imbes magsalig lang sa kuryente gikan sa Leyte—ug samtang ang dagkong planta sa kuryente nga tukoron mismo sa sud sa Bohol kumpletohon sa 2023 pa.

Sa maong tuig mo-expire ang mga kontrata sa Boheco I ug II ug Bohol Light sa tagsa-tagsa nila ka mga power supplier.

Apil kini sa basehanan sa mga inbestor nga intresadong motukod og mga pasilidad sa kuryente sa sud sa lalawigan.