NANGHATAG si Gob. Arthur Yap og mga emergency food pack sa mga isla sa Talibon diin ang katawhan ug ilang panginabuhing panagat apektado sa kusog nga habagat.

Isip tsirman sa Provincial Disaster Risk Reduction and Management Council, ang gobernador nakig-alayon sa DSWD-7 pinangulohan ni Regional Director Rebecca Geamala.

Ang mga isla sa Talibon nga apektado mao ang Busalian, Suba, Cataban, Guindacpan, Calituban, Sag, Nocnocan ug Mahanay.

Matud pa ni Provincial Disaster Officer Damalerio, ang DSWD nipasalig nga mag-andam og tabang para sab mga isla sa mga lungsod sa Getafe, Bien Unido, Buenavista  ug Pres. Carlos P. Garcia.

Apil sa prayoridad ni Yap ang panginabuhi sa mga mananagat sa amihanang bahin sa Bohol.

Uban ang nagkalain-laing ahensiya sa goberno, nagplano ang gobernador og usa ka kooperatiba nga mahimong kasaligang alternatibong tinubdan sa kita sa sektor sa panagat.