LABAWNG giihunahuna ni Gob. Arthur Yap ang kasigurohan nga moganansiya ang mga mag-uuma sa Bohol sa pagbaligya sa ilang palay.

Gumikan niini suportado niya ang programa sa nasudnong kagamhanan sa pagpalit sa mga aning humay ilabina sa mga gagmayng mag-uuma sa presyong makatarunganon.

Sumala sa lokal nga buhatan sa National Food Authority, pabiling bentaha kaayo ang presyo sa palay sa Bohol kay ang palit gikan sa P19 ngadto sa P20 matag kilo.

Palay ang tawag sa gianing humay nga wa pa magaling.

Sa pipila ka mga lalawigan sa Luzon, ang palay gipalit na lang og P11 kada kilo o ubos pa gani.

Mogasto ang maghuhumay didto og kapin sa P40,000 kada ektarya, apil ang mahal nga binhing maayo’g kalidad, abono ug uban pa.

Apan ang palay nga ilang maani mohalin na lang og P8,000 tungod sa grabeng pagkahagba sa presyo sa palit.

Gibasol ang Rice Tarrification Law nga niresulta sa pagbaha sa kamerkadohan sa nasud sa mga baratong humay gikan sa gawas o imported rice.

Usa kini sa mga nag-unang isyu nga gituki ni Yap uban kang Agriculture Sec. William Dar sa ilang consultative meeting sa kaulohan sayo ning semanaha.

Gikonsulta ni Dar si Yap isip kanhi kalihim sa agrikultura ug ang lain pang kalihim sa ahensiya kaniadto nga si Leonardo Montemayor. (Ven rebo Arigo)