MODAGHAN pa ang mga iskolar sa kagamhanang probinsiyal ubos ni Gob. Arthur Yap, kinsa malaumon sa suporta sa Sangguniang Panlalawigan (SP) tumong niini.

Katunga ang madugang sa gidaghanon sa mga iskolar sa sunod tuig tigtungha basi sa pondong iduso sa gobernador ngadto sa hunta probinsiyal.

Apan target gyod ni Yap ang 100% scholarship increase sa mosunod nga duha o tulo ka tuig.

Masaligon siya nga ang pondo aprubahan sa SP ubos ni Bise Gob. Rene Relampagos, kinsa matud niya kampeyon mismo sa edukasyon uban ni Kong. Edgar Chatto.

Ang Pres. Carlos P. Garcia Scholarship Program sa probinsiya gimugna ug nasugdan sa administrasyon ni Relampagos ug Chatto isip gobernador ug bise gobernador kaniadto.

Palapdan sab ni Yap ang kahigayonan sa panrabaho sa kabatan-onan.

Duha ka buwan kapin sukad sa iyang paglingkud, napahiluna ni Yap ang subra sa 5,000 ka mga batan-ong Bol-anon pinaagi sa Government Internship Program sa Department of Labor and Employment (DOLE).

Ang maong mass youth employment giingong maoy labing daghan sa Centra;l Visayas.