NAKIGSULTI ug naminaw si Gob. Arthur Yap hangtud sa labing yanong tawo sa labing hilit ug suok nga dapit pinaagi sa programang “Tingog sa Mga Bol-anon.”

Ang senemanang tulomanon iyang gimugna aron kanunayng suod ug duol sa iyang pagdumala ang katawhan.

Labawng importante niini ang paghatud ngadto sa katawhan sa mga batakang serbisyo ug ang ilang pagsalmot sa diskusyon sa nag-una nilang panginahanglan.

Kapin na sa 50 ka mga barangay sa 15 ka mga lungsod ang nabisita ni Yap—apil ang layong kaislahan sa Segundo Distrito—sud sa unang 100 ka mga adlaw sa iyang pagdumala.

Gisugdan na pod niya sa pagbisita ang mga barangay, apil ang pipila ka mga isla, sa Unang Distrito.

Nibisita kaniya sa kapitolyo ang mga opisyal sa subra na sab sa 50 ka mga barangay sa Tersero Distrito, diin siya’y kongresista sa tulo ka termino sa wa pa nagobernador.

Gitunol ni Yap di lang ang mga tabang pinansiyal apan usab mga relief food pack, ilabina sa mga isla ug baybayong dapit nga labawng apektado sa kusog nga habagat.

Sa iyang pagduaw sa kabus nga mga baryo, ang katawhan nagsangpit sa suportang medikal, pang-edukasyon, panubig, ug ubang serbisyo ug proyekto sa rural nga kalamboan.

Ang Tingog sa Mga Bol-anon maoy paagi ni Yap sa pagpahinumdum sa kaugalingon nga buhat ang pasulti-on.