ARON magsige’g sulbong ang turismo, angayng masabtan kon nganong talagsaon ang Bohol sa ubang destinasyon, matud ni Gob. Arthur Yap.

Ang katahom sa mga baybayon, sapa, busay, langob ug himsog nga kalasangan dayag lang nga makita sa tropical nga nasud sama sa Pilipinas.

Bisan ang tarsier sa Bohol adunay mga paryente sa Samar, Leyte ug Mindanao.

Apan suwabe ang Bohol kay bisa’g usa na kini ka tropical paradise, duna pa gyoy libo-an ka mga totoy nga bungtod—Chocolate Hills—nga nagtuybo sa dughan sa islang lalawigan gikan sa matris sa dagat.

Dugang niini ang mga simbahan nga nasudnong bahandi sa kultura, mga nasudnong landmark sa kasaysayan, ug uban pa nga naghatag og garbo sa pagka-Bol-anon, pagka-Pilipino.

Nagtanyag ang Bohol og kumpletong package sa eko-turismo nga gipun-an sa turismong adunahan sa pagtoo ug kultura.

Kining tanan giusa diha sa usa ka islang probinsiya nga sayon abton tungod sa mga maayong dalan, usa ka modernong internasyonal nga tugpahahan, ug mga pantalan nga nagdugtong sa ubang dapit sa Kabisay-an ug Mindanao.

Kini ang hinungdan nganong apil nga gipakadak-an ang proteksyon sa kalikopan ug pagpukaw sa kultura sa unang 100 ka gatos ka adlaw ni Yap sa pagdumala sa probinsiya.

Apan nabalaka si Yap sa iyang pagsawom sa kadagatan sa isla sa Balicasag sa Panglao kay nasaksihan niya ang epekto sa unregulated diving.

Kini samtang nagpadayon ang paresolbar sa mga isyo sa
sanitasyon, hinlo ug luwas nga paghipos sa hugaw, ug paglapas sa mga lagda sa kalikopan dili lang sa Panglao.

Aksyonan usab ni Yap ang isyo sa mga langyaw nagtrabaho dinhi apan way visa.

Bisan ang kultura ug tradisyon sa paglutong Binol-anon buot sa gobernador nga ipreserbar ug ipasigarbo.

Nangita siya’g mga “culinary champion” sa mga lokalidad aron ikadalit ang lami nga tradisyon ngadto sa mga bisita—ug ikapasa ngadto sa umaabot nga henerasyon pinaagi sa usa ka provincial culinary program.

Kaniadto, nagduka ang Bohol sa natad sa turismo ug kinahanglan pang iapil sa one-day Cebu tour package.

Karon, ang Sugbo maoy iapil sa Bohol tour experience.

Ang Bohol usa na ka stand-alone tourism destination, sumala sa Department of Tourism.

Ang Bol-anong turismo di na batang nagkamang ug gitun-an sa paglakaw. Nagdagan-dagan na kini—galukso-lukso, pinatakingking pa.