KRUSYAL sa pag-abante sa ekonomiya ug turismo sa islang probinsiya ang mga maugmarong pantalan ug maayong sistema sa transportasyon.

Andam ang administrasyon ni Gob. Arthur Yap nga mogasto uban sa Philippine Ports Authority (PPA) sa pag-ugmad sa mga pantalan.

Gitaho sa gobernador nga magpadayon ang PPA sa pagpalapad sa mga pantalan sa Tubigon sa pondong P400 milyones ug Tapal sa Ubay, P200 milyones.

Ugmaron usab ang pantalan sa Getafe sa inisyal nga pondong P95 milyones. Andam ang probinsiya nga motampo sa kaugmaran.

Ang dugang nga port development masinati usab sa Maribojoc, Catagbacan sa Loon, ug Jagna.

Ang pantalan sa Getafe posibleng mahimo usab nga cruise ship terminal sama sa Catagbacan, Loon.

Giawhag sa gobernador ang PPA sa pag-ugmad sa mga pantalan sa Aguining, isip agianan sa Bohol gikan sa Leyte, ug pantalan sa Popoo nga dunggo-an gikan sa pantalan sa Tapal sa Ubay.

Ang Aguining port og Popoo port pulos nahimutang sa islang lungsod sa Pres. Garcia.

Sa laing bahin, gipahibawo ni Yap ang paglusad di madugay sa standard nga sistema sa operasyon og pletehan sa transportasyon sa mga nag-unang dapit ug rota nga pangturismo.

Iyang gikumpirmar nga mobutang og buhatan sa Bohol ang Land Transportation Franchising and Regulatory Board (LTFRB) nunot sa hangyo sa kagamhanan sa probinsiya.

DIGITAL CONNECTIVITY

Gawas sa physical connectivity, importante usab kaayo ang digital connectivity ning kalibutan nga konektado sa wi-fi, matud ni Yap.

Padayong makig-alayon ang probinsiya sa mga mobile phone ug data company sa pagpalapad ug pagpakusog sa ilang mga serbisyo sa Bohol.