NAGPASALAMAT si Gob. Arthur Yap sa kapunongan sa agrikultura ug industriya’s baboy sa nasud sa suporta niini sa pagdili sa Bohol nga makasud ang karne’s baboy ug nalambigit nga produkto gikan sa Luzon.

Igo lang ang Bohol nga nag-amping kay dakong peligro sa lokal nga industriya kon makasud ang African swine fever (ASF) virus nga padayong nakaingon sa kamatay sa baboy sa Luzon.

Gipasalamatan sa gobernador ang Samahang Industriya ng Agrikultura (SINAG), nga niawhag sa DILG nga ipadayon sa mga provincial LGU ang entry ban sa mga processed pork product.

Nisuwat si SINAG Chairman Rosendo So kang DILG Sec. Eduardo Año aron ipadayag ang kabalisa sa pagdasig sa mga LGU sa paglibkas sa ban samtang padayong nagkatap ang mga kaso sa ASF.

Ang pagtangtang sa ban mosukwahi sa paningkamot sa Bohol ug Sugbo sa Kabisay-an ug Davao City sa Mindanao nga panalipdan ang ilang industriya sa baboy gikan sa pagkatap sa ASF, matud sa SINAG.

Matud ni So, si Philippine Association of Meat Processors, Inc. (PAMPI) President Felix Tiukinhoy nikumpirmar mismo nga ang ilang mga produkto wa moagi og ASF testing.

Himoon pa ang pag-eksamin kon ang mga processed pork product di ba kontaminado sa kagaw sa ASF.

Gihangyo na nilang So ang Department of Agriculture (DA) nga moeksamin sa tanang frozen meat sa mga cold storage facility, pinaagi sa independent third party sama sa SGS, apan way opisyal nga aksyon.

ASF SA IMPORTED PROCESSED PORK

Nibutyag ang pangulo sa SINAG nga duna nay mga insidenteng nagkumpirmar sa kontaminasyon sa mga processed pork nga nisud sa Pilipinas.

Duna poy mga insidente sa pag-importar sa usa ka sakop mismo sa PAMPI og mga prouktong karne sa baboy gikan sa mga nasud nga gidili nga makapasud niini sa Pilipinas, matud ni So.

Nibutyag si So nga sa ilang miting uban kang Department of Trade and Industry (DTI) Sec. Ramon Lopez, niklaro ang PAMPI nga di kini manginlabot sa unsang kalapasan sa bisan unsang sakop niini.

Niadton g Hunyo 14, and Bureau of Animal Industry (BAI) nikumpirmar nga dunay linatang produkto nga nakumpiskar sa Clark International Airport ug kini kontaminado sa ASF virus.

Sa samang buwan, subra sa 600 kilos nga gidiling imported pork product gikan sa Belgium—ug lain pang gikan sa Poland apan nagsukad sa Germany—ang nasakmit sa City Veterinary Office sa Sugbo.

Sakop sa PAMPI ang importer sa maong gidiling produkto.
Lain pang 4,000 kilos sa imported frozen pork gikan sa Germany ang nakumpiskar sa Sta. Maria, Bulacan niadtong Hunyo 30.

Usa ang Bulacan sa mga probinsiya sa Luzon diin apektado ang mga baboy sa ASF virus.

Sumala sa mga sakop sa SINAG, way laing sektor nga naalkanse og dako kaayo tungod sa ASF outbreak kundi ang ila sa namuhi’g baboy.

Ang industriya sa pagproseso’g karne gamay lang kon itandi sa P500 bilyones nga hog industry ug kalambigit nga patigayon, matud sa SINAG.

SINAG MISAKRIPISYO MISMO

Matud sa SINAG, minilyon ka mga namuhi’g baboy sa ilang nataran, mag-uuma, biyahero, naninda sa kamerkadohan, ahente, ug mga trabahante sa industriya sa beterinaryo ug feeds ang nagsalig sa hog industry.

“Apan wa kami moreklamo sa mga pagdili kay gusto namong protektahan ang mga rehiyon ug dapit nga way ASF sa pagkakaron,” nagkanayon ang kahugpongan.

Ang farmgate price sa mga backyard hog raiser ni-os-os ngadto sa P70-P80 kada kilo, halos 40% ang pagkunhod gikan sa P110-P115 kada kilo sa wa pa ang ASF sa Pilipinas.

Ang P30 matag kilo nga pagkubos sa presyo sa buhing baboy nagkahulogan og P2,250 nga mawa nga kiita sa kada baboy. Ang actual losses sa industriya matag buwan gibana-banang P48.57 bilyones, sumala ni So.

“Tinuod, makahugno, ug binilyong pesos ang pagdugo sa industriya tungod sa ASF. Apan bisan niini, among gisuportahan ang desisyon sa Visayas ug Mindanao sa pagdili sa pagsud sa among mga produkto ngadto sa ilang mga rehiyon aron sigurong magpabiling gawasnon gikan sa ASF ang Kabisay-an ug Mindanao,” matud ni So.

Nanghinaut si So ug ang SINAG nga irekonsiderar sa DILG ang memorandum nga nagdasig sa paglibkas sa ban—ug andam ang hugpong nga makigsulti og mopasabot kon gikinahanglan.