GIPAHINUMDUMAN ang kababayen-an nga ang early detection o sayo nga pagdipara sa posibleng kanser sa suso makaluwas sa kinabuhi.

Nunot niini, gikinahanglan ang labing daling pagpahiling sa ekspertong doktor kon dunay kadudahang gibati sa suso.

Kini sumala sa ICanserve Foundation nga nipahigayon og anti-breast cancer advocacy forum sa mga babayeng kawani sa kapitolyo ganihang buntag.

Ang advocacy group gilangkuban usab sa mga breast cancer survivor nga nisugilon mismo sa ilang risgong kasinati-an.

Ang grupo gipasalamatan ni Provincial Administrator Kathyrin Fe Pioquinto kay ang iyang iyaan usa usab ka breast cancer survivor.

Human sa forum, ang grupo nakigkita kang Gob. Arthur Yap,
kinsa bag-ong nabalik gikan nga nananum og kahoyng prutas uban ang mga polis ug sundalo sa Katipunan, Carmen.

Apil sa gihingusgan sa administrasyong Yap ang kahimsog ug luwas nga panglawas sa mga Bol-anon.

Nitambong usab sa forum sila si Bokal Jade Bautista, Lucille Lagunay, Frans Garcia ug Vierna Boniel-Maglasang, mga babayeng sakop sa Sangguniang Panlalawigan.

Uban kanila si Bokal Aldner Damalerio, nagpakita sa iyang pag-amping ug kahingawa sa sektor sa kababayen-an.

Ang Oktubre gisaulog isip Breast Cancer Awareness Month. (Ven rebo Arigo)