ANG MGA mag-uuma na usab sa Dagohoy sa Segundo Distrito ang gitunolan og mga assistance cash card human didto sa Loboc sa Tersero Distrito.

Nag-uban gihapon si Gob. Arthur Yap ug ang kadagkuan sa Landbank sa paghatud sa suportang pinansiyal.

Ang mga maghuhumay apektado sa Rice Tarrification Law, nga naka-os-os sa presyo sa palit sa ilang mga tipasi.

Saksi sa pagtunol sa mga cash card sila si OIC Provincial Agriculturist Larry Pamugas ug Mayor Sofronio Apat.

Ang suporta gipaagi sa Landbank SURE Aid Program Expanded Survival and Recovery Assistance Program for Rice Farmers.

Otsenta y siete (87) ka mga maghuhumay sa Dagohoy ug 83 sa Loboc ang nakadawat og cash card.

Samtang sa Unang Distrito, gihatud ni Yap ang mga relief food pack sa mga isla sa Bagongbanwa, Ubay, ug Batasan, tanan sa lungsod sa Tubigon, nga apektado sa niaging habagat.

Gipasalig sa gobernador ang tabang ngadto sa mga nag-unang panginahanglan sa mga islahaon.

Nasibot siya nga nisusi sa mga sakayan nga binuhat mismo sa mga islahanong mananagat.

Kuyog kaniya sa kaislahan si Mayor William Jao ug ubang opisyal sa lungsod. (Ven rebo Arigo)