SA NGALAN sa dayag ug sihag nga panggoberno, gimugna sa kagamhanan sa lalawigan ang Tingog sa Mga Bol-anon Hotline (Tingog Hotline).

Kini nunot sa Executive Order No. 6 ni Pres. Rodrigo Duterte nga nag-establisar sa 8888 Citizen Complaint Center.

Giisyu ni Gob. Arthur Yap ang memorandum ngadto sa tanang hepe sa departamento sa kapitolyo, apil ang sa 10 ka mga tambalanan sa probinsiya.

Ang mga concern ipadangat ngadto sa mga natungdang buhatan pinaagi sa Tingog Hotlines 09190023677 (Smart) ug 09175773677 (Globe).

Kini gilaumang mopatunhay sa pagdumalang nagtamud sa accountability ug transparency sa publikong panerbisyo, matud ni Provincial Administrator Kathyrin Fe Pioquinto.

Ang memorandum gipagawas sa gobernador pinaagi sa administrator. (Ven rebo Arigo)