NAHIDANGAT sa Trinidad ning adlawa ang mga serbisyo, programa’g kasayoran sa pangita ug panginabuhi nunot sa padayong Bohol Business One-Stop Shop (BOSS) – Asenso Negosyo – HEART Caravan.

Gipadangat usab ni Gob. Arthur Yap ang iyang suporta sa mga ahensiyang nagbuhat og maayo sa ilang mga obligasyon ngadto sa mga tawo.

Sa caravan, gidala sa Bohol Investment and Promotions Center (BIPC) ang mga ahensiyang nalambigit sa pagrehistro, paghatag og permiso ug lisensiya sa negosyo, ug ubang serbisyo.

Apil niini ang Department of Trade and Industry, Security and Exchange Commission, Bureau of Internal Revenue, Social Security System, Pag-IBIG ug Philhealth.

Lakip nga nanguna sa caravan sa Trinidad sila si Emely Gucor sa BIR, Atty. Alma Marie Dalena sa SEC, Mayor Judith Cajes, Bise Mayor Manuel Garcia, ug ubang opisyal sa LGU.

Gihatud ngadto sa maong lungsod sa Segundo Distrito ang episyenteng one-stop shop assistance alang sa sustenableng negosyo.

Gidasig sa gobernador ang pagnegosyo diha mismo sa kabalayan.

Subay sa turismo, adunay kahigayonan sa negosyo para sa mamaligya og mga bag, keychain, t-shirt ug daghan pang souvenir item.

Gipasalig ni Yap ang pagpadayon usab sa mga inisyatibang nagtutok sa agrikultura ug kahimsog. (Ven rebo Arigo)