Ang Pasko nagdala og mga gasa sa kalinaw, kahusay, panagda-it, kabulahanan ug kasadya.

Apan kini may katumbas.

Atong itanyag ang atong buhat ug kaugalingon isip gasa ngadto sa isigkatawo, ngadto sa kaliwat ug kultura, ngadto sa kalikopan, ngadto sa paninguha sa paglambo.

Kini ang bulawanong hinungdan nganong gipasulbong ang Four Pillars o Upat ka Dagkong haligi sa adbokasiya sa probinsiya ubos ni Gob. Arthur Yap :

Care for the weak o pag-amuma sa huyang ug hinikawan; protection of the environment o pagpanalipod sa kalikopan; reawakening of Boholano culture o pagpukaw sa kulturang Bol-anon; ug growing tourism economy o pagpausbaw sa turismong ekonomiya.

Ang Pasko maoy pagyukbo ngadto sa Batang gihimugso ug naghigda sa pasongan sa baka.

Apan kini mao usab ang pag-atiman sa mga nag-antos, gigutom, giuhaw, walay kusog, napasagdan ug sinalikway.

Ang Pasko gitradisyon sa Christmas tree nga atong gidayandayan ug nagpangidlap sa kaanyag.

Apan usab kini nagdasig kanato sa pagtanum og minilyon ka mga kahoy taliwa sa peligrong kausaban sa klima.

Ang Pasko perpektong gihulagway sa Belen ug mga pastores nga naghatag kanato og kahimatngon sa Gasa sa Langit, kabalaan sa banay, ug pagyukbo nunot sa hugot nga kultura sa pagtoo.

Apan kini nagtudlo usab kanato nga bulawan ang matag pamilya ug bahandi ang himsog nga kultura ug pagtoong Bol-anon.

Ang Pasko gihimaya sa labing langitnon ug matahom nga talan-awon sa Bethlehem nga gibisita sa Tulo ka Hari.

Apan usab kini nagpahinumdum kanato sa pagpasalamat sa Labawng Magbubuhat nga nagmugna sa Bohol nga madanihong destinasyon ug gibisita sa minilyong turista sa kalibutan.

Merry Christmas and A Happy New Year!

(Ven rebo Arigo)