MUGNA-ON sa Bohol ang labing unang Unified Command Center (UCC) sa probinsiya sa nasud, sumala ni Provincial Disaster Risk Reduction and Management Officer (PDRRMO) Dr. Anthony Damalerio

Kini dako’g kagamitan sa pagresponde sa emerhensiya kay dili lang mga personahe sa PDRRMO, PDRRM Council ug TaRSIER 117 ang modumala niini.

Lakip sa mga motawo sa center ang mga tinugyanan sa PNP, AFP, Bureau of Fire, Coast Guard ug ubang unipomadong ahensiya.

Ang UCC mahimutang sa kilid sa TaRSIER 117 sa sud sa Kampo Bernido sa syudad sa Tagbilaran.

Mokantidad kini og halos P10 milyones, dala ang istruktura ug mga ekipo.

Ang proyekto gisuportahan sa PDRRMC atol sa tigom nga gipangunahan ni Acting Gov. Rene Relampagos ug Provincial Administrator Kathyrin Fe Pioquinto sa kapitolyo ganihang buntag.

Kini pinaagi sa resolusyon sa PDRRMC nga giduso ni Bokal Lucille Lagunay nunot sa awhag ni Relampagos ug Damalerio.

Matud ni Damalerio, bugtong ang Sta. Rosa City sa Laguna maoy syudad nga adunay Unified Command System ug ang Bohol maoy unang probinsiya nga aduna unya niini sa sunod tuig.

Matud ni Damalerio, ang Unified Command Center nunot usab sa programa ni Gob. Arthur Yap nga ang Bohol kanunayng luwas di lang sa iyang molupyo apan sa mga bisita ug turista.

BAG-ONG MGA SAKOP

Unang higayon nga nitambong ang pipila ka mga bag-ong sakop sa PDRRMC gikan sa mga komiteba sa environment, social services ug peace and order sa Sangguniang Panlalawigan.

Lakip kanila sila si Lagunay, Restituto Auxtero, Ricky Masamayor, Aldner Damalerio ug Elpidio Bonita.

Nitambong usab sila si Philippine Councilors’ League-Bohol Pres. Jescelo Adiong ug Liga ng mga Barangay-Bohol Pres. Romulo Cepedoza, pulos ex-officio member sa hunta probinsiyal.

Una sab nga higayong nitambong ang bag-ong sakop sa PDRRMC nga si Dauis Mayor Meriam Sumaylo isip presidente sa tanang mayor sa kalungsoran sa Bohol. (Ven rebo Arigo)