KUHAAN gihapon og health declaration ang tanang mosud sa Bohol agi sa pantalan og tugpahanan bisan sa temporaryong entry ban sa nasud ngadto sa mga Insik ug ubang langyawng turista nga maggikan o miagi sa Tsina.

Matud ni Provincial Technical Working Group on Infectious Diseases spokesperson Dr. Yul Lopez, sa barko pananglitan hatagan daan og health declaration slip ang pasahero samtang wa pa modunggo sa pantalan.

Adunay designated crew o gitahasang tripulante sa barko nga maoy mokontak sa Philippine Ports Authority (PPA) kon aduna bay pasaherong i-assess dayon inigkanaug sa barko basi sa case management protocol.

Gimugna sa DOH ug probinsiya ubos ni Gob. Arthur Yap ug Bise Gob. Rene Relampagos ang health declaration system isip kabahin sa anti-novel coronavirus preventive / precautionary measures

Sa laing bahin, nitukma sa Chinese entry ban nga giluwatan sa Malacañang ang pamahayag ni Kong. Edgar Chatto sa media sa niaging semana nga maayong opsyon ang ban pinasikad sa rekomendasyon sa Department of Health (DOH) ug giya sa World Health Organization (WHO).

Taliwa sa pagkatap sa novel corona virus, ang entry ban usa ka opsyong himoon basi sa rekomendasyon sa DOH-WHO kay silay labawng nasayud sa isyo ug kahimtang, matud ni Chatto sa interbyu sa Tagbilaran-by-Nite sa DYRD niadtong Huwebes.

Ang pamahayag giluwatan sa kongresista ug kanhi gobernador tulo ka adlaw sa pa wa ang entry ban directive ni Pres.Rodrigo Duterte niadtong Domingo nunot sa sugyot sa national task force nga gipangunahan sa DOH.