KINAHANGLANG kanunayng mabinantayon ang mga health worker ug tagdumala ug kawani sa mga hotel ug resort ilabina sa pag-monitor sa kondisyon sa mga turista taliwa sa kabalisa sa novel coronavirus, matud ni Gob. Arthur Yap.

Ang mga nurse ug technical health worker sa kagamhanan padayon usab nga gipa-monitor sa Bohol Panglao International Airport ug mga pantalan.

Ang Inter-agency Technical Working Group on Infectious Diseases nga gimugna ni Acting Gov. Rene Relampagos nagpahiluna sa dugang pang preventive measure bisa’g way kumpirmadong novel coronavirus case sa Bohol.

Hinuon adunay usa ka patient under investigation (PUI) sa Bohol nga usa ka Chinese national, tulo sa Negros Oriental, ug 11 sa Sugbo, sumala sa Department of Health.

Gitoohang daghan pang Chinese national ug ubang turista nga gikan o niagi sa Hong Kong ug Macau nga nakasud na sa Pilipinas sa wa pa ideklarar sa Malacañang niadtong Domingo ang entry ban.

Matud ni Gob. Yap, inadlawon sa pag-monitor ang mga turista nga nagpakita og China o Hong Kong passport sa ilang pag-check-in sa mga hotel ug resort.

Ang mosud sa Bohol agi sa tugpahanan ug mga pantalan gi-require nga mohatag sa ilang health declaration pinaagi sa giandam nga papel nga dunay mga pangutanang ilang tubagon.

Ang mga hotel ug resort kinahanglang aduna mismoy medical staff monitor nga magbantay kada adlaw, matud ni Yap.

Basi sa entry ban directive sa Malacañang, adunay sistema ang nasud sa repatriation o pagpapauli sa mga Chinese national o ni bisan kinsang langyawng turista nunot sa pagsiguro nga di mokatap sa Pilipinas ang Chinese coronavirus. (Ven rebo Arigo)