PADAYON ang Philhealth gikan sa kagamhanang probinsiyal para sa opisyales sa barangay nga ma-admit sa tambalanan.Apil niini ang kapitan, kagawad, tresurero, sekretaryo ug SK tsirman, sumala ni Provincial Budget Officer Peter Ross Retutal.

Kaniadto, milyones kada tuig ang gahin sa kapitolyo sa ilang Philhealth enrolment, apan gamay lang—10 porsento (10%) ngadto’s 30—kanila ang nakagamit sa Philhealth kay wa nasakit.

Ang Philhealth contribution karon para gyod ni bisan kinsang opisyal sa barangay nga aktuwal nga masud sa tambalanan.

Ang dakong bahin sa tinuig nga milyones para unta sa ilang Philhealth enrolment nga gamay rang magamit adto mapunta sa mga proyekto ug serbisyo sa barangay.

Wa gyod gitangtang ang pondo para sa aktuwal nga magkinahanglan sa tabang sa Philhealth sa probinsiya, pero mas praktikal karon aron di mausik ang kuwarta.

Matud ni Provincial Social Welfare Officer Mita Tecson, dunay opisyales sa barangay nga ang asawa o bana o sakop sa pamilya nagtrabaho nga membro sa Philheatlh.

Ang senior citizen apil pod sa Philhealth sa gobernong nasyonal samtang ang indigent / kabus nga sakop sa Pantawid awtomatik sa Philhealth.

Ang wa awtomatik nga na-renew adunay tabang sa ilang premium kay mahimo silang boluntaryong membro sa Philhealth.

Adunay social worker sa 10 ka tambalanan sa kagamhanang probinsiyal nga motabang kanila sa pagpahiluna sa ilang Philhealth premium.

Naa usab ang maayo kaayo nga Universal Health Care para sa tanang Pilipino aron makapahimus gyod sa Philhealth, sumala ni Dr. Cesar Tomas “Yul” Lopez.

Konway ikabayad sa Philhealth, puwede pod nga tabangan pinaagi sa Point of Service ug goberno ang mo-enrol sa Philhealth.Ipatuman sa Bohol sa sunod tuig ang Universal Health Care, apil ang libreng konsultasyon ug tambal.

Pananglitan, ang giubo mopakita og Philhealth card sa pagpakonsulta ug laboratoryo ug libre na siya bisan sa pribadong doktor, sumala ni Lopez.

Tungod sa paglapad sa serbisyo sa Philhealth, nisaka ang tinuig ga premium.“Apan di maguol ang atong barangay official kay si Gob. Art Yap, ang atong administrasyon, nagpabilin ang iyang assurance nga kon masakit sila, pahibaw-on dayon ang social welfare office nga mohatag sa assistance nga mag-enrol dayon ug mag-update,” nagkanayon si Lopez. (Ven rebo Arigo)