NAGLIHUK ang agresibong programa ni Gob. Arthur Yap sa limpyo ug luwas nga tubig, batakang panginahanglan nga wa, nihit o kuwang sa daghan pang barangay sa Bohol.

Apil sa direksyon sa iyang administrasyon ang pag-ugmad sa mga tinubdan sa tubig alang usab sa agrikultura.

Isip inisyal, andam na ang P47 milyones sa probinsiya aron itabang sa pag-ugmad sa serbisyo sa panubig sa kalungsoran sa kantidad nga P1 milyon kada usa.

Kini tugbangan sa matag LGU og 25% aron intresado gyod kaayo nga mopatuman sa proyekto— ug nahibawo na ang mga lungsod sa ubang sumbanan aron makakuha sa pondo sa kapitolyo.

Ang paghatag og tubig sa giuhaw nga mga dapit kabahin sa haliging adbokasiya niYap nga mao ang care for the weak o pag-atiman sa makalolooy ug kabus.

WAY TUBIG

Sa pagkakaron, 269 na ka mga barangay sa 27 ka mga lungsod ang“waterless” basi sa beripikasyon sa Provincial Planning and Development Office (PPDO) ug Bohol Environment and Management Office (BEMO).

Sa 47 tanan ka mga lungsod, 36 na ang nisumiter og lista sa mga barangay nga way tubig—ug kini nagpasabot nga mosaka pa ang ihap sa mosunod nga beripikasyon.

Sa 269 nga mga verified waterless barangay, 145 ang tua sa Segundo Distrito, 69 sa Tersero Distrito, ug 55 sa Unang Distrito.

Sa laing bahin, 380 ka mga barangay ang nagsalig lang sa level 1 water source sumala salistahan nga gisumitir sa 19 pa lang ka mga lungsod.

Ang level 1 nga sistema sa panubig naglakip sa deep ug shallow well, abli nga atabay, tubod, sapa-sapa, poso, ug tangke sa uwan.

Sa 380 ka mga barangay, labing daghan gihapon ang tua sa Segundo Distrito, 262; Unang Distrito, 68; ug Tersero Distrito, 50.

Butangan ni Yap og pasilidad sa water desalination ang mga islang problema kaayo’g tubig mainom sama sa Bilangbilangan West ug Hingutanan sa Bien Unido, ug Guindacpan ug Cataban sa Talibon, tanan sa Segundo Distrito.

Gihimo na ang site validation sa mga isla, matud ni Engr. Angelus Sales, planning officer III sa PPDO nga maoy nag-andam sa water program report.