Usa ka gatos (100) ka mga batid nga doktor sa mata sa kalibutan ang libreng moopera dinhi mismo sa Bohol sa posibleng labing dako nga eye surgical mission sa Pilipinas karong Hulyo.

Kini makasaysayanon nga “eye care for you” program sa Philippine Gift of Life ubos ni President/Chief Executive Officer Francisca Baluyot ug kagamhanang probinsiyal ubos ni Gob. Arthur Yap.

Usa sa mga pillar advocacy o haliging adbokasiya sa administrasyon sa lalawigan ang “care for the weak” o pag-atiman sa makalolooy ug kabus.

Nipahibawo si Baluyot kang Yap nga nakahukom na ang World Opthalmology Assciation sa paghimo sa “First International Cataract Operation” niini sa Pilipinas—ug kini sa Tagbilaran City, Bohol mismo.

Giaprubahan sa World Opthalmology Congress sa California niadtong Enero ang pagdonar og eye medical supply para sa 5,000 ka mga pasyente nga mopahimus sa kinadak-ang libreng cataract operation, matud ni Dr. Federico Malubay, consultant sa Gift of Life.

Mosalmot sa cataract operation ang Philippine support team nga mga espesyalista gihapon sa mata.

Gipahibawo usab ni Baluyot si Yap nga hangtud sa Marso 31 ang pagrehistro sa mga pasyente sa mata ug ilang pagsumitir sa mga gikinahanglang papel.

Ang Gift of Life, kapitolyo, kahugpongang medikal, kagamhanan sa syudad sa Tagbilaran ug uban pa kanunayng nag-alayon sa mga libreng operasyon sa nagkalain-laing balatian sa mga Bol-anon. (Ven rebo Arigo)