SUBLING nagpasidaan si Gob. Arthur Yap nga sundon ang mga protocol sa agresibong prebensyon kay limitado ang pasilidad sa pagdumala sa dinaghang kaso sa inpeksyon.

Matud niya, madumala sa healthcare system sa Bohol ang hangtud sa 30 ka mga kaso sa COVID-19 infection ug maong kinahanglang sabton ang kasamtangang limitasyon sa pasilidad ug ekipo sama sa mga ventilator.

Usa kini sa mga kritikal nga hinungdan nganong angay usab nga limitahan ang matag hugna sa pagpasulod sa mga manguling Bol-anon sama sa mga OFW.

Gipahinumdum niya pag-usab nga krusyal sa kaluwasan sa katawhan ang ilang pagtuman mismo sa mga preventive protocol sama sa social distancing, pagsul-ob og face mask, sanitasyon sa mga establisamento, ug uban pa. (Ven rebo Arigo)