DAWATON ang mga locally stranded individual (SLI) nga wa nay rapid antibody test, apan moagi gihapon sila og 14 diyas nga kuwarentina sa pasilidad sa ilang mga LGU.

Kini gipadayag ni Gob. Arthur Yap sa panagtapok sa media sa kapitolyo karong udto human usab siya nakigtagbo sa medical advisory group ug mga mayor.

Basi sa konsultasyon sa mga doktor, ang rapid test isip requirement sa LSI aron makauli way kapuslanan ug usik-usik lang sa kuwarta, nga mas maayo pang iandam sa gasto sa pagkuwarentina.

Libo-libo ka mga LSI ang inanayng dawaton sa ilang pagbalik sa Bohol, ilabina ang 14 ka adlaw nga pagkuwarentina ug ubang panginahanglan sa tukmang pagpahiluna ug pag-atiman kanila.

Atubangan sa media, nihimo ang gobernador og graphic presentation sa unom ka paagi sa pag-detect sa kagaw sa COVID-19, apil ang RT-PCR ug rapid antibody test nga gigamit sa Pilipinas.

Ang graphic presentation gibasi sa pagtuon sa mga eksperto sa University of the Philippines ug mga espesyalistang medikal sama ni Dr. Ellan Salada kinsa infectious disease specialist sa Bohol.

Gipakita niini nga ang rapid antibody test way kapuslanan ngadto sa way simtomas o gibati.

Ang labing saktong panahon nga kini epektibo anaa sa ikaduha ngadto sa ikatulong semana sa pagpakita sa mga simtomas.

Way hinungdan ang pagsitar nga mopa-rapid test ang LSI ug kinahanglang negatibo sa di pa mopauli apan pipila ka adlaw sukad sa pag-abot anha pa mogawas ang simtomas, sumala sa gobernador.

Uyon ang mga doktor ug mayor nga maayo pag ang kuwarta igasto sa pagkuwarentina sa mga LSI sa mga pasilidad sa ilang mga LGU, matud ni Yap.

Subay sa kahibawo sa mga doktor, labing siguro ang RT-PCR test kay “most accurate” duha o tulo ka adlaw sa wa pa ang simtomas ug sa tunga-tunga sa unang semana sa paggawas sa mga simtomas, matud ni Yap.

Ang diperensiya lang kay samtang mausik ang kuwarta sa rapid test nga mogastog P1,000, di paigo sa laing bahin ang suplay sa RT-PCR bisan pag may pondo ang goberno, nagkanayon ang gobernador.

I-RAPID KON MAY SIMTOMAS NA

Gisubli ni Yap nga nasabotan uban sa mga doktor nga dawaton ang mga LSI bisag way rapid test sa ilang gigikanan sa dayon gyong pag-uli sa Bohol.

Apan magpabiling mandatory ang ilang 14-day quarantine sa mga pasilidad sa mga LGU.

Kon sud sa maong panahon adunay mopakitag simtomas, anha pa himoon ang rapid test kay ang resulta niini labing menos maoy basehan kon sundan ba og PCR test.

Labing menos, kini usab ang sumbanan sa direksyon sa pagprayoridad sa PCR testing nga mogastog P5,000-P8,000, matud ni Yap.

Apan giklaro usab sa gobernador nga bisag way gyoy simtomas ang LSI sa panahon sa kuwarentina, himoon ang rapid test sa ika-14 nga adlaw alang sa katapusang paniguro.

Kini alang ra gihapon sa kaayohan sa LSI kaysa hasolon sa pagpa-rapid test aron lang makauli apan sa pag-abot na mopakitag simtomas ug mausik lang ang pondo sa goberno sa way kapuslanan.

Kanit niini, gipangutana sa gobernador si DILG Sec. Eduardo Año kagabii kon puwede ba nga di na lang pangayoon ang local health certificate, apil ang sa quarantine sa mga LSI sa mga dapit diin sila gikan.

Apan “nanghunaw” sa iyang tubag ang kalihim kinsa niingon nga wad-on sa national Inter-Agency Task Force (IATF) ang requirement kon ang LGU andam nga modawat sa LSI nga way medical certificate. ( Ven rebo Arigo )