OPISYAL nga gitaho ni Inter-Agency Task Force (IATF) chief implementer Sec. Carlito Galvez, Jr. kang Pres. Rdrigo Duterte kagahapon nga himoong modelo ang Bohol ubos sa “new normal” nga epekto sa COVID-19 pandemic.

Ang pagtaho buhing gihulagway sa nasudnong telebisyon sa MalacaƱan diin iya usab nga gipahibawo ang presidente nga ang Bohol “nagpabiling COVID-free.”

Karong buntag, gitaho ni Bohol Technical Working Group spokesperson Dr. Yul Lopez nga negatibo sa RT-PCR test ang 17 anyos nga dalagitang pasyenteng gioperahan sa Ramiro Community Hospital.

Nagnegatibo na usab ang doktor ug duha ka medtech sa Gov. Celestino Gallares Memorial Hospital (GCGMH) nga nataptan didto sa Cebu City samtang nag-COVID laboratory training sa Vicente Sotto Memorial Medical Center.

Negatibo pod ang mga ilang mga pamilya ug staff sa GCGMH nga gi-PCR test basi sa contact tracing, matud ni hospital chief Dr. Mutya Kismet Tirol-Macuno.

Nagkanayon si Galvez kang Duterte nga sugdan sa pagbalik og abli ang ekonomiya sa turismo sa Bohol isip modelo sa new normal sa nasud.

Nibisita ug gihatud mismo ni Galvez, IATF ug Deputy Chief Implementer Vince Dizon sabBohol niadtong Sabado ang bag-ong RT-PCR machine para sa molecular laboratory sa GCGMH nga posibleng mo-operate na sa Hunyo.

Ang mahinungdanong ekipo gitugyan ngadto kang Gob. Arthur Yap ug sa GCGMH.

Kagahapon, gitaho sa Department of Health ang bag-ong 539 confirmed positive cases sa Pilipinas, labing taas nga pagsaka sa nasud sud lang sa usa ka adlaw, ilabina sa Metro Manila ug National Capital Region.Usa ka OFW ang nagpositibo human niabot dinhi kapin na sa buwan ang nilabay, apan sa gawas sa Bohol siya nataptan.

Nigawas ang positibong resulta sa iyang PCR test sa Manila dihang nagkuwarentina na siya ug kaubanang OFW dinhi.

Apan wa siyay simtomas ug nagnegatibo ra gihapon human sa duha ka repeat test ug nabalik na sa iyang pamilya.

Way lokal nga transmisyon sa kagaw sa Bohol hangtud karon ug kini tataw nga usa sa gibasehan sa taho sa hepe sa IATF ngadto sa presidente nga “Bohol is still COVID-free.”