GISUPORTAHAN sa Regional Development Council (RDC-7) ning adlawa ang mga inisyatiba ni Gob. Arthur Yap sa pagtabang sa gagmayng negosyo, agrikultura ug proyekto’s tubig.

Apil sa diskarte sa gobernador ang pagtabang sa mga adunay huwam sa bangko aron di sila magapos sa dakong bayronon taliwa sa kalisud tungod sa COVID-19.

Unang ponto ni Yap ang pagpahuwam sa Landbank ug Develoment Bank of the Philippines ngadto sa mga LGU sa ubos o zero interest aron iayuda sa gagmayng negosyo, agrikultura ug mga proyekto sa panubig.

Kini aron makalihuk ug mobalik ang pag-ugmad sa maong mga sektor ubos sa gitawag og bag-ong kasarangan o new normal.

Sa tigom sa RDC pinaagi sa videoconference, gidasunan usab ang awhag ni Yap sa Bangko Sentral nga tugotan ang pag-restructure sa mga loan apan way multa o patong.

Kini aron gaan sa pagbayad sa mga adunay huwam sa mga bangko ug ubang institusyon sa pamuhonan.

Suportado usab ang sugyot sa lider sa Bohol alang sa koordinasyon sa Department of Trade and Industry kalabot sa posisyon sa rehiyon sa posibleng pagpasud sa internasyonal nga mga kompanya nga mobiya sa Tsina.

Daghan ang mga langyawng kompanya sa Tsina gumikan sa abunda’g barato nga pamuo o labor ug ubos nga gasto sa operasyon.

Apan sila naapektohan sa COVID-19 nga nagsukad didto, tandugon nga diplomatikong kahimtang, ug ubang kritikal nga kalibutanong hinungdan.