Ang DILG gitaho nga nagmandar nga itugot ang home quarantine na lang sa mga OFW ug SLI.

Nagpuno kini sa kabalisa kay sayo niini, wa na pod i-require nga moagi pa bisan sa rapid antibody test ang mga LSI sa dapit diin sila stranded aron makauli sa ilang mga probinsiya.

Sa Manila ug National Capital Region, natala sa mga niaging adlaw ang labing taas na nuon nga inadlawng pagsaka sa mga new confirmed positive cases.

Daghan gihapon ang samang kaso sa Cebu City ug ubang dapit sa probinsiya sa Sugbo.

IS BOHOL THEN GETTING SAFER?

Di pasupak ang nasudnong kagamhanan sa gusto! Aron ingnon nga maoy labawng nagpangga sa mga stranded probinsiyanos bahalag ang lokal nga kahimtang maoy magkapangos-pangos.

Nagtagbo si Gov. Art Yap ug mga mayor sa Bohol kagahapon. Nagkahiusa sila nga pabiling ipatuman ang 14 diyas nga kuwarentina. Apan adunay 3 ka mga opsyon o kapilian ang mga LGU/Mayor sa pagpatuman niini. Kini gilatid sa memorandum sa gobernador nga nigawas ning adlawa.

Una–Mahimo ang quarantine sa usa ka private/commercial facility sama sa hotel nga aprubado sa BIATF. Apan sugod sa June 16, personal na ang paggasto sa hotel sa mga OFW ug LSI ( nga mopili sa hotel kaysa LGU facility). Nahurot na kuno ang pondo sa OWWA sa paggasto sa mga OFW.

“Nabangkaruta” diay ang kagamhahang nasyonal para sa gitawag ra sab niini og mga modernong bayani nga dakog kontribusyon sa ekonomiya sa nasud? Daghan kaayong OFW nga maoy naggasto sa kaugalingon, apil sa hotel, samtang sila stranded sa kaulohan.

Ikaduha—Puwedeng adto ra sa mga quarantine facility nga iya o gidumala sa mga LGU.

Ikatulo—Tugotan ang home quarantine pero agad sa desisyon sa Mayor/LGU sa pagpili kon kinsa ang angayng makakuwarentina sa balay. Kay kinahanglang ang panimalay walay senior citizen o bata.

Kon mo-decide ang Mayor nga adto sa balay ikuwarentina ang OFW/LSI, i-lockdown ang panimalay kauban ang pamilya sud sa 14 diyas.

Walay usa nga mogawas sa balay. Ang pagkaon ihatud sa barangay official—o manugo ang tagbalay nga magpapalit. Kon dunay mga bata, senior citizen or masakiton sa balay, sila kuhaon aron ilain sa pagpahiluna sa dili pa ipatuman ang lockdown sa panimalay.