Gawas sa turismo, tutokan ang produksyon sa pagkaon sa inanayng pagbalik og abli sa ekonomiya sa Bohol.

Kini gipaniguro ni Gob. Arthur Yap kang National Economic and Development Authority (NEDA)-7 Regional Director Efren Carreon sa ilang videoconference kagahapon, Lunes, Hunyo 8.

Matud sa gobernador, ang nahitabo sa turismo karon gumikan sa COVID-19 naghatag og leksyon nga gahinan og igong konsentrasyon ang agrikultura ug pagkaon.

Og way maayong pangandam sa ubang industriya ug panginabuhi, sigurado ang gobernador nga mameligro usab ang ekonomiya.

Ang pandemic puwedeng masubli sa di matag-an nga umaabot ug angayng makat-on ang mga Bol-anon sa grabeng epekto niini sa ekonomiya, suplay sa pagkaon, ug tawhanong kahimtang, sumala ni Yap.

Nibutyag usab ang gobernador sa direktor aa NEDA nga ang kagamhanang probinsiyal andam mamuhonan sa pagtukod og mga economic zone aron mokatag ang ekonomikanhong kalihukan. (PRIMER, June 9, 2020)