GIPAHINUMDUMAN ang mga mayor ug local health official sa istriktong quarantine protocol samtang nasinati ang pipila ka mga kaso sa COVID-19 nga naglambigit og mga LSI.

Sa unom ka mga aktibong kaso sa COVID-19 sa Bohol karon, upat ang mga LSI nga gi-isolate sa mga pasilidad sa Syudad saTagbilaran (2), Sagbayan (1), ug Candijay (1).

Ang laing mga active case mao ang duha ka mga healthcare personnel sa Ace Medical Center kinsa anaa sa hospital isolation bisag wa say mga simptomas sama sa mga SLI.

Matud ni COVID-19 Technical Working Group spokesperson Dr. Yul Lopez sa virtual presser sa kapitolyo karong hapon, wa membro sa pamilya nga makabisita sa mga LSI sa mga LGU quarantine facility.

Gikonsiderar ni Lopez ang mga active COVID case nga igong pasidaan nga magbinantayon ang tanan samtang anam-anam nga milugak ang pipila ka mga restriksyon.

Ang pagluag sa mga lagda naglakip sa pagtugot sa limitadong dine-in sa mga kan-anan, apil ang mga fastfood outlet sa mga mall.Dili gyod mokumpiyansa bisan pa usab kon way nagpakitag simtomas sa mga contact trace nga gihimo, sumala ni Lopez.

Aduna 2,325 ka mga LSI ug 48 ka OFW nga nagpadayon sa ilang kuwarentina sa nagkalainlaing pasilidad sa tibuok probinsiya.Sa mosunod nga duha ka adlaw, 67 ka mga OFW ang mouli sa Bohol gikan sa Sugbo Sila pulos naggikan sa Manila ug gihapit sa Sugbo samtang gi-validate ang ilang mga sertipikasyon, ilabina ang kalabot sa PCR test. (Ven rebo Arigo)