MALAUMON si Dr. Mutya Kismet Tirol-Macuno nga mo-operate ning buwana ang COVID-19 molecular laboratory sa Gov. Celestino Gallares Memorial Hospital (GCGMH).

Anaa na ang ubang ekipo ug gipaabot ang reagent refrigerator aron himoon ang sample proficiency testing ug sugdan ang aktuwal nga operasyon.

Kini bugtong nga negative pressurized laboratory sa rehiyon, sumala sa hepe sa GCGMH kinsa sakop sa Bohol Inter-Agency Task Force (BIATF) nga gimugna ni Gob. Arthur Yap.

Ang kagamhanan sa probinsiya may lahi nga pasilidad—containerized RT-PCR laboratory—nga gilaumang magamit na sab di madugay.

Kini ibutang sa Panglao international airport ug mga nag-unang pantalan sa probinsiya.

“We are just one,” matud ni Macuno nga ang gipasabot mao ang koordinasyon sa GCGMH, kagamhanang probinsiyal, ug ubang ahensiya ug institusyon sa pagresponde sa COVID-19.

Tulo ang andam nga PCR machine sa GCGMH, usa niini gihatag sa national Inter-Agency Task Force (IATF) ngadto sa probinsiya ug gitugyan ni Yap ngadto sa GCGMH.

Nalipay si Kong. Edgar Chatto nga gisiguro usab ang biosafety sa GCGMH lab nga gitabangan niya sa paglihuk.

Ang negative pressure sa laboratory modugang sa biosecurity.

Matud ni Macuno sa “Inyong Alagad” Program sa DYRD, ang tulo ka mga PCR machine sa tambalanan moproseso hangtud sa 1,000 ka mga swab sample kada adlaw.

Ang usa ka makina moproseso og 80 ka mga sampol matag “run” niini—ug kini maka-run kaupat sa usa ka adlaw.

Lima gyod unya ang PCR machine sa GCGMH kay may duha pa nga moabot.

Malaumon ang hepe sa labing dakong publikong tambalanan sa Bohol nga ang COVID testing center makapagawas og resulta pagkaugma.

Kaduha na inspeksyona sa Department of Health (DOH) ug Research Institute for Tropical Medicine (RITM) ang lugar ug pasilidad sa GCGMH nga giandam para sa molecular laboratory.

Sayo niini, giklaro sa gobernador nga di kaabli’g balik ang turismo hangtud nga ang Bohol adunay PCR laboratory ug sigurong kapasidad sa contact tracing.

Sugod ning buwana, iapud-apud ni Yap ang contact tracing card nga adunay QR (quick response) code sa matag pamilya/panimalay sa Bohol. (Ven rebo Arigo)