NAGTUBOD usab ang kasaysayan sa isla sa Pandanon sa Getafe kay nakaangkon kini sa unang seawater desalination plant gikan sa kagamhanang probinsiyal.

Ang teknolohiya sa pasilidad motab-ang sa tubig-dagat aron mainom ug mapuslan sa ubang kagamitan sa panimalayng islahanon.

“Walay nitoo kanako niini kaniadto. Niingon sila nga ‘unya na kami motoo kon among makita’,” prangkang nitug-an si Gob. Arthur Yap sa mga pagduda kaniadto atol sa interbyu sa MyTV Cebu niadtong Hulyo 15.

Ang desalination plant giinagurahan ni Yap uban kang Mayor Casey Shaun Camacho usa ka adlaw sa wa pa ang interbyu.

Wa pay laing isla nga aduna niini gikan sa Kapitolyo—ug 10-15 ka mga desalination facility ang ibutang sa gobernador sa ubang islang barangay.

Sama sa ubang isla sa Segundo Distrito, ang tubig nga mainom maoy labawng problema sa mga molupyo sa Pandanon sukad sa una nilang katiguwangan.

Ang kasulbaran sa batakang panginahanglan nagmatuod nga “buhat maoy pasulti-on,” matud sa mga islahanon.

Ang pasilidad moproseso og 10,000-11,000 litros nga tubig kada adlaw.

Ipahiluna ni Yap ang ubang pasilidad sa pabor ug sayon nga mga dapit sa mga hugpong sa islang barangay sa norteng bahin sa lalawigan.

Naandan sa mga islahanon sa Pandanon nga mopalit ug maghakot og tubig gikan sa lungsod sa mainland Bohol.

Ikarga’g pumpboat ang ilang mga gallon container ngadto sa Poblacion sa Getafe ug balik sa tunga sa lawod nilang pinuy-anan.

Karon, ang sayon ug baratong tubig nag-agas na mismo sa ilang isla.

Kaniadto, ang tubig-mainom ilang labngon gikan sa lawod ngadtos baybayon ug paliton sa P2.00-P2.50 kada litro o P2,000-P2,500 kada metro kubiko.

Karon, naangkon na nila ang tubig sa sud mismo sa isla nga 50 sentabos matag litro o P500 matag metro kubiko gumikan sa desalination plant ni Yap. (Ven rebo Arigo)