UPAT ka mga lawak-tulonghaan ang ibutang ni Gob. Arthur Yap sa Danao Technological College aron itabag ugmad sa teknikal nga edukasyon di lang sa Segundo Distrito.

Ang proyekto gitawag sa gobernador og gasa sa kagamhanang probinsiyal sa katawhan sa Danao ug duha niini ang iyang giinagurahan niadtong Miyerkoles.

Nanguna si Yap sa groundbreaking sa pagtukod sa laing duha ka mga classroom nga ning higayona gikan sa Federation of Filipino-Chinese Chambers of Commerce and Industry, Inc. (FFCCCII).

Pinangayo sa gobernador ang dugang school building pinaagi sa iyang amahang si Domingo Yap, kinsa president emeritus sa nasudnong pederasyon sa patigayon.

Uban ni Yap sa seremonyas sila si Mayor Jose Cepedoza, Bokal Frans Garcia ug Bokal Romulo Cepedoza, kinsa Association of Barangay Councils (ABC-Bohol) president ug igsoon sa mayor.

Sa Danao gihapon, giapud-apud ni Yap sa mga eskolar sa Technical Education and Skills Development Authority (TESDA) ang mga himan sa employment skills training.

Ang mga Bol-anong may potensiyal isip skilled worker gidugtong sa gobernador ngadto sa TESDA alang sa libreng bansay-bansay.

Kini motabag sulbad sa pagkaway trabaho ug moabli sa dugang kahigayonan sa panginabuhi. (Ven rebo Arigo)