ILUSAD sa probinsiya ang Sun Rice, brand o klase sa de kalidad nga bugas-humay nga siyento porsentong abot sa Bol-anong mag-uuma.

Kini apil sa mga dagkong kalihukan sa agrikultura sa Bohol nga pangunahan sa Grand Harvest Festival sa Nobembre kon way kausaban o kakulian.

Nunot sa Palay Buy Back Program sa probinsiya, gisugdag dawat sa goberno ang ani sa mga mag-uuma nga giproseso sa Rice Processing Center (RPC) sa Pilar.

Giplanong senemana ang kumprada sa probinsiya gikan sa RPC.

Hangtud sa Oktubre 14-16, nikabat na og 1,035 ka bakid/sako nga hybrid palay ang napalit sa probinsiya gikan sa 17 ka mga mag-uumang apil sa programa.

Kini may katumbas nga timbang nga 38,452 ka kilo sa kantidad nga P717,406, sumala sa buhatan sa agrikultura sa lalawigan.

Ang programa sa kagamhanan sa pagdawat sa abot sa mga mag-uuma usa ka paagi sa pagtabang sa maayong pagmerkado sa ani sa ilang kakugi.

Kini nunot usab sa Advanced Rice Technology (ART) 160 Program ni Gob. Arthur Yap nga nagsuporta sa mga maghuhumay aron moanig 160 ka sako kada ektarya.

Gihimo ang unang hugna sa ART 160 crop cut sampling nga naglambigit sa humayang gitikad sa 10 ka mga kapunongan sa mga irigador .

Ang ISIDJO irrigators association sa Talibon ang kinatas-ag ani nga 10.8 metriko tolenadas matag ektarya gamit ang hybrid nga binhi.

Aduna say ART 120 Program nga nagtumong sa pag-ani og 120 ka sako kada ektarya gamit ang inbred rice seed. (Ven rebo Arigo)