LIG-ON ang pag-alayon sa nasudnong kagamhanan ug kapitolyo sa Bohol sa pakigbatok sa kawad-on, sumala ni National Anti-Poverty Commission (NAPC) Sec. Noel Felongco.

Ang NAPC ubos sa buhatan ni Pres. Rodrigo Duterte.

Matud ni Felongco kinsa usab NAPC lead convenor, maayo ug “labaw pa gani” ang mga ideya ni Gob. Arthur Yap sa pagdugtong sa mga programang nasyonal ug lokal kontra sa kapobrehon.

Nanguna sila ning adlawa sa virtual launching sa programa sa NAPC nga “Sambayanihan, Serbisyong Sambayanan” (3S o Three S) uban ang mga mayor sa inisyal nga 14 ka mga lungsod.

Apil niini ang Inabanga, Pres. Garcia, Alicia ug ubang lungsod sa Segundo ug Tersero Distrito .

Gilagdaan ang memorandum of agreement sa pagpatuman sa Bohol sa programa nga nagpunting sa pagpakunhod og labing menos siete porsento (7%) sa kakabus sa nasud sud sa lima ka tuig.

Prayoridad sa Three S nga tabangan ang mga sektor sa naglisud nga mag-uuma, mangingisda, indigenous people, kabataan ug estudyante, urban poor, kababayen-an, mga may kabilinggan sa panglawas, informal worker/settler, kooperatiba, NGO, ug biktima sa katalagman o kalamidad.

Nalipay ang kalihim sa NAPC sa kasibot sa gobernador sa pagpahiluna og buhatan sa NAPC sa Bohol ug pagmugnag anti-poverty provincial consultative body.

Gipadayag ni Felongco kaganiha ang kamahinungdanon sa Three S atol sa programang Silab sa Udtong Tutok sa DYRD. (Ven rebo Arigo)