ANG pagdawat sa indibidwal nga mga turista gikonsiderar nga labing agresibong aksyon sa pagpahiuli sa turismo sa Bohol sukad sa pag-abli niinig balik bisan sa padayong pandemya.

Sila gitawag usab og frequent individual travelers (FITs) ug leisure travelers.

Banhawon ang turismo aron mabalik ang trabaho, matud ni Department of Tourism Sec. Bernadette Romulo-Puyat kinsa nag-alayon ug si Gob. Arthur Yap ug ubang natungdan sa Bohol.

Apan giklaro sa gobernador nga sundon ang istriktong lagda sa pagpailawom sa COVID-19 test ug pagsumitir sa negatibong resulta 72 oras  sa dili pa molarga padung sa Bohol.

Kinahanglang kumpirmadong daan ang booking sa tour ug hotel nga sertipikado sa DOT ug selyado sa kagamhanan sa lalawigan ubos sa Ultimate Bohol Experience (UBE) Program.

Kini aron ang turismo sigurong magsunod sa mga lagda sa IATF ug uban pang sumbanan taliwa sa nagpadayong hulga sa COVID-19.

Ang turista kinahanglan pod unang morehistro online pinaagi sa tourismbohol.gov.ph. aron mahatagan daan og quick response (QR) code.

Ang turista o bisita nga moistar sa Bohol sud lamang sa lima ka adlaw dili na kinahanglang mokuwarentina.

Apan ang molapas sa unom ka adlaw kinahanglang moagi og laing RT-PCR test sa iyang ikalimang adlaw sa Bohol ug ikuwarentina hangtud nga mogawas ang negatibong resulta.

Gipasidan-an ang si bisan kinsa nga mopeke sa iyang negative RT-PCR result sama sa gihimo sa pipila ka mga turista sa Boracay.

Nalukapa ang panginabuhi sa daghang Bol-anon dungan sa pagkahagba sa turismo 10 na ka buwan sukad sa paghasi sa COVID-19 sa nasud. (Ven rebo Arigo)