NATUMAN na gyod ang dugay rang gipangandoy sa mga Bol-anon nga satellite office sa Professional Regulation Commission (PRC).

Kini nahimutang sa kaniadto Provincial Budget Office sa taas sa daang Kapitolyo nga atbang sa Plaza Rizal sa syudad sa Tagbilaran.

Di na mogasto ug mahasul ang mga Bol-anon sa pag-adto sa PRC Regional Office sa Sugbo o sa buhatan usab niini sa Dumaguete City, ilabina sa lisud nga pagbiyahe karon tungod sa pandemya.

Apil sa pasiunang serbisyo sa PRC-Bohol Satellite Office ang pagproseso sa renewal sa daan ug release sa bag-ong PRC card, aplikasyon sa eksaminasyon, sertipikasyon ug awtentikasyon sa mga PRC document.

Nidawat na og mga kliyente ang buhatan sukad sa soft opening niini niadtong Disyembre 21 bisan og padayon pang gitaud ang linya sa kompyuter ug koneksyon sa internet.

Ang satellite office ubos gihapon ni PRC-7 Officer-in-Charge Gina Emperado ug gidumala ni Professional Regulation Officer 1 Ginalyn Lozada isip team leader.

Si Lozada gikan sa rehiyonal nga buhatan ug usa ka Bol-anong taga-Baclayon.

Nagpasalamat siya sa sa kagamhanang probinsiyal ubos ni Gob. Arthur Yap ug Bise Gob. Rene Relampagos kay giayudahan dayon siya og upat ka mga staff, usa ka drayber ug usa ka utility worker.

Ang mga supportang kawani pulos gisuweldohan sa Kapitolyo samtang gipaabot nga makumpleto ang kahimanan sa satellite office ug ang support staff nga gikan mismo sa PRC.

Plano ni Lozada nga aduna gyoy pormal nga seremonya sa pagkamugna sa PRC Bohol Satellite Office ug kini tambongan sa gobernador ug ubang opisyal sa Bohol.

Ang pagbutang og satellite office unang gilihuk ni kanhi Gob. Edgar Chatto, karon kongresista sa Unang Distrito, samtang padayong gitukod niadtong higayona ang karon bag-ong Kapitolyo.

Ang paningkamot ni Chatto gisuportahan pinaagi sa resolusyon sa Sangguniang Panlalawigan kaniadto ubos ni kanhi Bise Gob. Dionisio Balite.

Ang resolusyon giduso ngadto sa PRC Regional Office, apan si Chatto naningkamot pa gyod sa pag-lobby ngadto mismo kang PRC Chairman Teofilo Pilando.

Suportado ang plano sa paglingkud ni Yap isip gobernador hangtud nga kini natuman na karon.

Anaa sab sa daang Kapitolyo—sa ubos nga andana sa PRC office—ang probinsiyal nga buhatan sa Department of Agrarian Reform (DAR).

Sa ground floor, nga kaniadto giokupar sa Provincial General Services Office, mopahiluna ang Register of Deeds. (Ven rebo Arigo)

(Hulagway: Giasikaso ni Lozasa ang mga kliyente ganiha.)