DUGANG pa nga mga barangay ang nakadawat og tagsa ka gatos ka libong pesos (P100,000) nga ayuda gikan sa probinsiya para sa ilang proyekto sa panubig.

Ang mga tseke gitunol ni Gob. Arthur Yap sa kadagkuan sa barangay didto sa Kapitolyo ning adlawa human natapos ang iyang kuwarentina nga nilapas sa unang semana sa bag-ong tuig.

Ang mga barangay mao ang Poblacion sa Antequera; Baucan Norte sa Balilihan; Lomboy sa Calape;  Dela Paz ug  Patrocinio, Cortes; Agsoso,  Canhangdon Oriental,  Canmanoc,  Cogon Sur, Catagbacan Norte,  Catagbacan Sur,  Genomoan, Mocpoc Norte,  Mocpoc Sur,  Pantudlan, Talisay,  Tiwi,  Ubayon,  Ubojan ug Quinobcoban sa Loon;  Comaang ug Nahawan sa Clarin;  Tomoc sa San Miguel; ug Sag sa Talibon.

Gitunol usab ni Yap ang mga tsekeng ayuda alang sa ubang proyekto sa Villa Aurora, Antequera; Cansuaguit, Loon; Ilijan Sur, Tubigon; ug Cambangay Norte, San Miguel.

Ang kawala o kakuwang sa suplay sa limpyo ug luwas nga tubig sa panimalay pabiling suliran sa daghang dapit sa Bohol, sumala mismo sa mga tinugyanan sa nagkalain-laing LGU.

Si San Miguel Mayor Virgilio Mendez, pananglirtan, nalipay sa programa ug tanyag ni Yap sa pagtabang nga masulbad ang dugay na kaayong problema. (Ven rebo Arigo)