PADAYONG ubos ang mga aktibong kaso sa COVID-19 sa Bohol bisag taas gihapon ang mga bag-ong kaso sa nasud basi sa taho sa Department of Health ug World Health Organization.

Hinungdan niini ang pag-alayon sa mga Bol-anon, ilabina mga health frontliner, ug kadagkuan sa kagamhanan pinangunahan ni Gob. Arthur Yap ug 48 ka mga mayor sa kalungsoran ug syudad.

Sa Enero 12, nitala ang Bohol og 14 na lang ka mga aktibong kaso samtang subra sa duha ka libo ka mga bag-ong kaso sa COVID-19 ang natala sa tibuok nasud.

Ang Bohol Inter-Agency Task Force nag-awhag sa padayong pagpatuman ug pagsunod sa mga protocol.

Apil niini ang higpit nga pagbantay sa mga baybayon ug kaislahan kay duna lang gihapoy mosuway sa pagsud gikan sa ubang probinsiya nga way pagtamod sa mga lagda sa kuwarentina.

Wa say kumpiyansa ang Kapitolyo kay giandam niini ang plano sa pagpalit og P100 milyones nga bakuna batok sa COVID-19. (Ven rebo Arigo)