Mipagawas ug dugang bag-ong lagda si Gob. Arthur Yap pinaagi sa Executive Order (EO) 56-A ug EO 2 series of 2021, diin mas gipalapad ug gipalig-on ang pagdili sa pagpasulod sa mga kahayopan, mga semilya, gi-prosesong produkto nga karne ug ang mga gipangsakyan ani sa pagbyahe gikan sa Luzon ug Mindanao ug karon apil ang mga Probinsya sa Leyte ug Southern Leyte.

Ang maong lagda gipirmahan dayon tungod sa kinaunhang kasong natala didto sa Abuyog, Leyte kabahin sa pagkanap sa African Swine Fever (ASF) diin 6 bilyon ka pesos sa industriya sa pagpamuhi ug baboy ang nameligro diri sa Bohol.

Langkob sa maong dugang nga lagda ang pagbag-o sa EO 56 diin ginadili na ang pagpasulod sa probinsya ug mga buhing kahayopan, mga karneng baboy, mga cargo vehicles lakip ang mga container vans, mga pagkaon ug manok ug isda, apil ang mga hilaw nga mga materyales sa pagbuhat ug mga pasaw diin muagi sa Pan-Philippine Highway nga nagkonekta sa Maharlika Highway diin konektado usab sa mga isla sa Luzon, Samar, Leyte ug Mindanao.

Aduna may dukumento o wala, ang tanang mga nahisgotang produkto dili gyud pagatugutan nga dawaton sa pagsud diri sa lalawigang Bol-anon. Ang mga maong mando gikan sa ehekutibo epektibo sugod Enero 15 karong tuig. (Jigs Senagan, PriMeR)