NALIPAY ug mapasalamaton kaayo ang hepe sa labing dakong publikong tambalanan sa Bohol sa tabang sa Kapitolyo sukad sa pagsugod sa pandemya sa niaging tuig.

Dakong kalisdanan sa Gov. Celestino Gallares Memorial Hospital (GCGMH) sa pagpanguna sa health emergency management isip COVID-19-dedicated facility kon wa pa ang suporta sa probinsiya.

“Very much appreciated” ang ayuda sa kagamhanan sa lalawigan ubos ni Gob. Arthur Yap, matud ni GCGMH chief Dr. Mutya Kismet Tirol-Macuno.

Kini gipadayag ni Macuno ngadto sa gobernador, mga hepe sa departamento sa kagamhanang probinsiyal ug media atol sa press conference sa Kapitolyo karong buntag.

Tukma ang koordinasyon nga gihimo ug makonsiderar nga maayo ang pagdumala sa krisis dinhi bisan pa sa pagsulbong sa mga kaso sa COVID-19 sa nasud, sumala sa doktor.

Sa laing tigom ning adlawa, ipresentar ni Macuno ang ideya sa pag-aplay sa Bohol sa mga estratehiya ug interbensyon sa pipila ka mga dapit sa kalibutan diin malamposon ang pagsanta sa pandemya. (Ven rebo Arigo)