WA nagtak-om si Gob. Arthur Yap sa plano sa Sangguniang Panlalawigan (SP) sa pagpalit og mga sakyanan para sa mga magbabalaod sa probinsiya.

Dunay pamahayag ang gobernador ug kini ang iyang gisulti:  Hatagag higayon ang mga sakop sa SP o hunta probinsiyal nga maoy mopatin-aw kay ila ang pondo ug silay mogamit.

Adunay basehanan ang procurement samtang wa nagpasagad ang probinsiya bisag dako na kaayo ang gasto taliwa sa pandemya sukad sa niaging tuig, matud sa gobernador.

Kini iyang gibungat atol sa press conference mismo sa Kapitolyo niadtong Biyernes nga gisaksihan sa mga hepe sa departamento sa probinsiya ug ubang opisyal.

Wa nagpakahilum si Yap. Wa lang siya paminawa maong natuis ang estorya.

Gani, ang kagamhanan sa lalawigan nga iyang gipangunahan nangayog awtoridad sa Department of Interior and Local Government (DILG) ug kini giaprubahan.

Dili madayon ang vehicle procurement kon way pagtugot sa DILG kay maoy lagda bisag aduna pay andam nga pondo ang SP para niini.

Wa say awtoridad nga ihatag ang DILG kon ang vehicle program dili balido ug matakarunganon.

Sa niaging tuig, ang nasudnong kagamhanan nipalit og duha ka jet plane balig P2 bilyones aron magamit sa presidente ug mga senyor nga opisyal sa militar sa panahon sa krisis.

Ang SP nga gilangkuban ni Bise Gob. Rene Relampagos isip presiding officer ug 13 ka mga bokal o board member nigahin og P24 milyones para sa ilang bag-ong service vehicle.

Ang 14 ka mga daang sakyanan gipalit og kapin sa P15 milyones kaniadto, usa sa 2006 pa, ug nigasto na ang gobernog dul-an sa P12 milyones sa repair-maintenance niini sukad sa 2013 hangtud 2020.

Usa sa mga balidong basehanan sa new procurement ang grabe na kadako ug kas nga repair-maintenanceair expenses sa mga daang sakyanan.

Matud sa mga kontra sa pulitika ug kakunsabo, dili angayng mopalit og sakyanahn ang SP kay iprayoridad ang pagresponde sa COVID-19 ug panglawas sa mga tawo.

Kini pagpakaaron-ingnon ug panglingla aron mahilo-an nila ang panabot sa publiko. Ngano?

Sa 2019 pa unta ang P24 million vehicle purchase, apan wa idayon kay kalit nga nahitabo ang COVID sa pagsud sa 2020 ug wa kaandam ang probinsiya niini—o bisan unsang LGU sa nasud.

Apan sa gihapon, gigamit sa probinsiya ang daghang alokasyon sa 2020 para unta sa ubang gastohanan aron idapat sa mga programa batok sa palandongang pandemya ug epekto niini.

Ning tuiga, 2021, ang probinsiya naggahin og P942 milyones o dul-an P1 ka bilyon para sa mga programa sa COVID, panglawas ug 10 ka mga mga tambalanan nga gidumala sa lalawigan.

Sa niaging tuig, P1.2B ang napunta sa mga programa sa COVID, healthcare ug pag-ugmad sa 10 ka mga tambalanan nga apil sa pagdumala sa health crisis.

Kini wa itug-an sa mga pulitikanhong tigdaot ug ilang kakunsabo ngadto sa publiko.

Buot nilang palutawon nga kaugalingon lang sa mga sakop sa SP ang gilantaw ug gisakripisyo ang pagtagad sa katawhan taliwa sa pandemya.

Nagpakabana kunohay sila para sa katawhan. Hipokrito! Ngano?

Sukad kaniadto, ang tanang programa, interbensyon ug kalihukan nga gigastohan sa probinsiya taliwa sa COVID ilang gisaway, giintriga ug gidaot imbes motabang bisag ideya na lang.

Way nitandug sa ilang kaugalingong binuhatan kay sila man, kay ila man.

Sa gobernador si Relampagos kaniadto, gisaway ang pagpalit og mga sakyanang Adventure ug gikastigo ang pagpalit og Strada sa panahon ni kanhi Gob. Edgar Chatto. Kay di man ila.

Namalit og mga sakyanang Crosswind sa panahon ni kanhi Gob. Erico Aumentado. Way niintriga ug nidaot. Kay ila man.

May COVID o wa, ug bisag dul-an sa P1 ka bilyon ang gahin sa probinsiya ning tuiga para sa programa sa panglawas, atakehon gyod sa mga kontra si Gob. Arthur Yap ug Relampagos.

Kay di man ila, di man sila.

Ang pagtuis sa bisan unsang estorya sayon para sa mga adunay laing motibo, naanad.

NAUSIK NGA PAGLAUM

Kaniadto, nigasto ang goberno og daghang milyones di para sa Adventure, Strada o Crosswind apan BARGE—MV Paglaum—nga magamit unta sa katawhan sa islang lungsod sa Pres. Garcia sa Segundo Distrito.

Ang barge wa gyod napusli sa mga islahanon, Bol-anon.

Hinuon, nadiskubre kini nga gahakot og quarry materials para sa pribadong resort sa Panglao.

Karon, asa na ang barge sa katawhang inyong gipangga?

Way nangintriga. Way nanaway. Nindot. Sakto.  Dalaygon. Kay ila man. (Ven rebo Arigo)