BISAN sa pagdaot sa mga kontra sa pulitika, dili kapugngan ang programa sa panubig ni Gob. Arthur Yap sa mga lungsod nga nakakita sa kaayohan ug gustong mopahimus niini.

Apil sa programa ang Marcelo-Mabini Waterworks Project sa Mabini sa Tersero Distrito nga pondohan sa 20% Development Fund sa kagamhanan sa lalawigan.

Kumpleto na ang field survey ug engineering design niini ug hapit na mahuman ang sabotsabot tali sa mga tag-iyas yuta kalabot sa right of way.

Dakong bahin sa programa sa panubig sa administrasyong Yap ug Bise Gob. Rene Relampagos ang gastohan gamit ang credit facility sa Kapitolyo sa bangko nga P1 ka bilyon.

Hinuon dili magasto ang tibuok kantidad kay agad lamang kini sa mga LGU nga mopahimus sa credit facility sa probinsiya kaysa modirekta sa bangko nga taas kaayog patong.

Apil niini ang Valencia Waterworks Project nga kumpleto nag field survey ug engineering study ug hapit na matapos ang detailed engineering design ug cost estimate.

Ang San Miguel Water Development Project sa Segundo Distrito nagpaabot na lang sa paggawas sa pondo gikan sa huwam sa probinsiya sa bangko.

Apil usab ang Duero Waterworks Project ug Pilar-PICOWASSCO Water System Rehabilitation/Improvement Project – Phase I sa Tersero Distrito.

Natapos na ang topographical survey ug geo-technical investigation sa duha ka proyekto ug nagpadayon ang ilang detalyadong engineering design.

Maserbisyohan sa Pilar-PICOWASSCO Phase I ang siyam ka mga barangay sa Pilar ug mga dapit sa Segundo Distrito sama sa 11 ka mga barangay sa Dagohoy, unom sa San Miguel, ug lima sa Ubay—nga may kinatibuk-ang populasyon nga 45,380.

Bisan ang Phase II sa Pilar-PICOWASSCO Project gisugdan na sa pag-andam pinaagi sa site verification nga gihimo sa Provincial Water Resources Management Team sa Bohol Environment and Management Office (BEMO).

Kini mohatag og tubig sa laing walo ka mga barangay sa Pilar, tulo sa Ubay, ug usa sa Alicia

Sa Segundo Distrito, ang Talibon – Trinidad-Bien Unido Cluster Bulkwater Project nga mokantidad og P250 milyones ug ang Sikatuna-Talibon Earthfill Dam Construction Project nga P200 milyones gihimo-an nag topographic ug profile survey.

Ang bulkwater project moserbisyo sa 14 ka mga barangay sa Talibon, 16 sa Trinidad, ug pito sa Bien Unido nga may kinatibuk-ang populasyon nga subra sa 80,000.

Ang Dimiao Waterworks Project sa Tersero Distrito suportado sa 20% Development Fund sa probinsiya ug gipaabot nga ipatuman usab ning tuiga.

GIDAOT KAY MAPUSLANON

Nangugat ang mga kontra sa pulitika batok sa water program sa probinsiya aron ang mga LGU dili mosangpit sa Kapitolyo ug mag-iyahayg pinsar kon unsaon nila pagsulbad ang suliran sa kakuwang sa tubig—hinlo ug luwas nga tubig.

Kini wa igsapayan ni Yap kay ang bulawanon para kaniya mao ang pagtabang ug pagsuporta sa mga LGU taman sa mahimo nga di mag-agad sa pulitikanhong kalainan.

Ang ngil-ad mao kanang hilabihan ka-busy sa pangintriga ug pamulitka apan way saktong gihimo sa daghang panginahanglan sa katawhan ug mao pay nagpatoong tarong ug kama-o.

Sa laing bahin, ang probinsiya, pinaagi sa ordinansa sa Sangguniang Panlalawigan, adunay alokasyon nga P235 milyones aron ikonkreto sa dugang importanteng kadalanan nga nagsumpay sa kalungsoran.(Ven rebo Arigo)