BAKAK UG MAKAILAD ang laing intriga nga adunay bag-ong upat ka mga supplemental budget nga giaprubahan ang Sangguniang Panlalawigan sa kantidad nga P183 milyones.

Giklaro ni Provincial Budget Officer Peter Retutal kon unsay tinuod taliwa sa gihingusgang panghilo sa pikas kampo sa pulitika ug kakunsabo ngadto sa hunahuna sa publiko aron masuko sa kagamhanan sa probinsiya.

Ang ulahing supplemental budget sa probinsiya nibalor lamang og P28 milyones ug dili P183 milyones sumala sa intriga.

Kini naglakip sa pagpalit og ekipo sa hemodialysis center sa Garcia Memorial Provincial Hospital sa Talibon, pondo sa research ug pagtukod sa Bohol Heroes Hall, ug dugang pondo sa mga water desalination project.

Aprubado kini sa SP pinaagi sa Apprpriation Ordinance No. 2021-011.

Ang SP niaprubar usab og Supplemental Investment Plan (SIP) alang sa nagkalain-laing programa sa balor nga P155.5 milyones.

Apan kini lista pa lang sa mga dugang plano ug dili supplemental budget nga aduna gyoy aprubadong ordinansa sa aproprasyon.

Ang tanang LGU, apil ang syudad ug lungsod, nasayud kon unsay SIP ug unsay budget nga aduna nay aprubadong ordinansa sa aproprasyon.

Ang SIP usa ka lista sa mga plano, prayoridad nga programa, proyekto ug kalihukan nga puwede ganing mapondohan gikan sa ayuda sa gawas sama sa mga nasudnong ahensiya.

Kini kwentada pa lamang sa mga plano ug programa aron mapangitaan og pondo.

Gani, puwedeng kabahin lang sa mga programa ang mapondohan dayon o kaha di lang una iapil sa gasto kay sila mag-agad sa pondong magamit.

Apan ang SIP aprubahan sa SP bisag plano pa lamang kay maoy gimando sa Joint Memorandum Circular NO. 01-2007 ug 1-2016 sa DILG, NEDA, DBM ug DOF.

Ang nasudnong circular may kalabotan sa

Guidelines on the Harmonization of Local Planning, Investment Programming, Resource Mobilization, Budgeting, Expenditure Management, and Performance Monitoring and Coordination in Fiscal Oversight.

Ang SIP magsilbeng sumbanan sa dugang nga mga programa, proyekto ug kalihukan nga gikonsiderar nga prayoridad usab ug nagsuporta sa mga tumong ug tuyo sa usa ka LGU.

Kini mapatuman lamang kon adunay aprubadong pondo.

Ang SIP No. 3 giduso gikan sa Provincial Development Council pinaagi sa PDC Res. No. 50-2021.

Kini gidasunan sa SP isip dugang plano pinaagi sa Res. No. 2021-395 ug dili appropriation ordinance.

Kini dili pa budget kay ang mga plano, programa ug kalihukan sa SIP mapalihuk ug mapatuman lamang pinaagi sa mga probisyon sa pondo nga aprubado sa ordinansa sa aproprasyon.

Sa intrigang kuwentada, posibleng gipuno ang SIP nga P155.5 milyones ngadto sa Supplemental Budget No. 4 nga P28 milyones aron molutaw nga P183 milyones ang budget nga giaprubahan kunohay.

Ang supplemental investment plan ug supplemetal budget managlahi nga dokumento.

Ang usa lista pa lang sa mga dugang plano ug ang ikaduha budget na gyod nga aprubado.

Ang record sa SP makamatuod niini ug angayng susihon sa mga intrigador—ug sa tighungit nilag storya nga lubag aron padayong gub-on ang pagdumala ni Gob. Arthur Yap ug Bise Gob. Rene Relampagos.

Gani, dili ikahibung nga ang usa ka LGU mopasar og investment plan nga dako pa sa budget sa LGU nianang tuiga.

Kini kay adunay mga plano ug programa sa investment plan nga gilantaw o gipanghinaut nga makaangkon og pondo ug masugdag patuman sa umaabot nga katuigan—apil ang ayuda gikan sa gawas nga tinubdan sama sa pondong nasyonal. (Ven rebo Arigo)