Siete mil kinyentos (7,500) ka trabahante sa turismo ang target nga bakunahan hangtud sa mosunod nga mga adlaw gamit ang inisyal nga 10,000 doses sa vaccine para sa ilang sektor.

Kuwatro sentos singkuwenta (450) na ang natupokan sa unang dose sukad sa tourism frontline worker vaccination rollout sa Bellevue Resort sa Panglao niadtong Biyernes.

Matud ni Provincial Health Office OIC ug Bohol Inter-Agency Task Force spokesperson Fr. Yul Lopez, sugdan karong adlawa ang pagbakuna sa laing vaccination site sa Modala Resort sa Panglao gihapon.

Nibutyag si Joan Pinat sa Provincial Tourism Office nga dugang vaccination venues ang buksan sama didto sa Dauis, Tagbilaran City ug ubang destinasyon sa turismo.

Target ang pagbakuna sa 200 ngadto 300 ka mga tourism workers kada adlaw ug  kini  magsaka agad sa gidaghanon sa mga vaccination centers ug suplay sa bakuna.

Si Gob. Arthur Yap mismo ang nisugat sa unang 10,000 doses sa bakunang Russian Gamaleya o Sputnik V ug Chinese Sinovac para sa mga tourism workers didto sa Bohol Panglao International Airport sa niaging semana.

Nilampos ang gobernador sa pagpugos sa Inter-Agency Task Force ug Department of Tourism nga hatagan ang Bohol og bakuna alang sa mga trabahante sa turismo.

Ang Bohol maoy unang nakabakuna sa mga tourism frontliners sa nasud. (Ven rebo Arigo)